"Dowladda Soomaaliya oo Sheegtay In Horjoogayaal Al-Shabaab Lagu Dilay Moqokori"
Diyaarado dagaal oo ay wadeen ciidamada Dowladda Federaalka Soomaaliya, oo kaashanaya saaxiibada caalamka, ayaa duqeyn qorshaysan ka fuliyay saldhigyo ay Al-Shabaab ku lahaayeen degmada Moqokori ee gobolka Hiiraan.
Howlgalkan oo ay fuliyeen Ciidamada Hay’adda Nabad Sugidda iyo Sirdoonka Qaranka (NISA) ayaa lagu dilay saddex horjooge oo sare oo ka tirsanaa Al-Shabaab, sida lagu sheegay bayaan kasoo baxay dowladda.
Mid ka mid ah horjoogayaashii la dilay ayaa la xaqiijiyay inuu yahay Cabdi Xiiray, sarkaal sare oo lagu eedeeyay inuu qorsheeyay weerarro isdaba joog ah oo lagu qaaday shacabka iyo ciidamada amniga ee ku sugan deegaannada maamulka Hirshabeelle.
Ilaa hadda, dowladda ma soo bandhigin sawirrada horjoogayaasha lagu dilay duqeynta, balse saraakiisha ammaanku waxay sheegeen in howlgalkani yahay mid “strategic ah” oo lagu beegsaday bartilmaameedyo muhiim ah oo kooxda xiriir la leh.
Saraakiisha NISA ayaa sheegay in howlgalkaasi uu qeyb ka yahay dadaallo lagu wiiqayo awoodda Al-Shabaab ee gobolka, iyagoo adkeeyay inay sii wadi doonaan weerarrada qorsheysan ilaa laga xaqiijinayo nabadda iyo xasilloonida shacabka Soomaaliyeed.
