CIA-da Mareykanka oo Taageertay Aragtida Trump ee Duqeymihii Nukliyeerka Iran
Madaxa hay’adda sirdoonka Mareykanka (CIA), John Ratcliffe, ayaa taageeray mowqifka Madaxweynihii hore Donald Trump ee ahaa in duqeymaha Mareykanka uu ka fuliyay xarumaha Nukliyeerka Iran ay sababeen burbur ballaaran oo ku dhacay kaabeyaasha muhiimka ah ee barnaamijka nukliyeerka dalkaas.
Ratcliffe ayaa sheegay in CIA-du heshay xog sirdoon oo cusub, oo lagu kalsoonaan karo, taasoo muujinaysa in si weyn loo burburiyay xarumo muhiim ah oo qeyb ka ah barnaamijka nukliyeerka Iran.
Si kastaba ha ahaatee, maamulka Trump ayaa hore uga gaabsaday xog sir ah oo la dusiyay, taasoo sheegaysay in dhaawaca gaaray xarumahaasi uu ahaa mid kooban, islamarkaana aysan si buuxda u burburin xarumihii bartilmaameedka ahaa.
Ergeyga gaarka ah ee Trump u qaabilsan Bariga Dhexe, Steve Witkoff, ayaa wareysi uu siiyay telefishanka Mareykanka ku sheegay in hormarinta barnaamijka nukliyeerka Iran ay weli tahay "khad cas" oo Mareykanka u ah, balse uu rajeynayo in la gaaro heshiis nabadeed oo buuxa.
Dhanka kale, Trump ayaa shaaca ka qaaday in wada-hadallo rasmi ah ay todobaadka soo socda dhex mari doonaan saraakiil ka tirsan Mareykanka iyo kuwa Iran, taasoo la filayo inay qeyb ka noqoto dadaallada lagu xallinayo xiisadda u dhaxeysa labada dal.
