In Ka Badan 100 Hay’adood oo Caalami ah oo Ka Digay Gaajo Ba’an oo Qasa ka Dillaaceysa

Marinka Qasa ayaa wajahaya xaalad bini’aadantinimo oo aad u daran, kaddib markii in ka badan 100 hay’adood oo caalami ah iyo ururo gargaarka ka shaqeeya ay ka digeen halista gaajo baahsan oo ka dillaaceysa halkaasi. Hay’adahaasi waxay si wadajir ah ugu baaqeen beesha caalamka in ay si degdeg ah u qaadaan tallaabooyin wax ku ool ah si loo badbaadiyo nolosha shacabka Qasa.

Hay’adaha digniinta diray waxaa ka mid ah:

• Dhakhaatiirta Aan Xuduudka Lahayn (MSF)

• Save the Children

• Oxfam

Bayaan ay si wadajir ah u soo saareen ayay ku sheegeen in xaaladda gargaarka Qasa ay tahay mid aad u xun, isla markaana ay socoto xayiraad adag oo saameyn ku yeelatay gaarsiinta cuntada iyo daawooyinka.

Dowladda Israa’iil, oo gacanta ku haysa dhammaan gargaarka la geynayo Qasa, ayaa diidday bayaanka hay’adaha, iyadoo ku tilmaantay inuu yahay “boronbogaando loogu adeegayo Xamaas.”

“Ma jiraan cunto ku filan oo taalla Qasa,” ayay sheegeen dhakhaatiirta. “Carruur badan ma helaan caano, hooyooyin badanna nafaqo darro darteed uma suurtagasho inay nuujiyaan. Markasta oo hay’ad caalami ah isku daydo inay keento caanaha carruurta, masuuliyiinta Israa’iil ayaa la wareegaya.”

Warbixinta ayaa si adag u muujisay baahida loo qabo in la sii daayo gargaarka la hakinayo, si loo ilaaliyo nolosha dadka rayidka ah, gaar ahaan carruurta iyo hooyooyinka nugul ee ay saameysay colaaddu.